Frühlingsreise 2016 ins Ämmital

E abwäggsligsriichi Fahrt gniesse mier. Huttwil Spycherhandwärk isch ds Ziel Spyche Handwärk was isch das? Irgendöppis mit Schaf, Wullerverarbgitig etc. isch i mym Chopf.

Der Herr Grädel Bsitzer vom Betrieb stellt üs das vielsitige Spycher Handwärk vor. Nüt vo nume Schafwullverarbitig. Pulloverchueh ( Schaf ) i verschiedene Rasse, Lama, Alpaka, Mohairgisse, Wulleschwein, Hüender u Kamel. D Kamel la grad ds Haar la ga, gseh us wie d Schabi we hinderne gsi. Ds achttag alte Kamelchälbli isch e Attraktion für jede Bsuecher.Chasch o Kameltrekking mache oder i ächt mongolische Jurte ubernachte. Im vielsitge Lade chasch vor Scherischnittcharte ube Wulle, Socke, Halstüecher, Chueh- u Schaffäll, Finke, Schueh, Chlider bis um komplette Bett als ha. Idrücklich wie vielsitig me die Wulle cha verarbite.Gluschitg gmacht? Gankg lueg sälber, äs isch sech derwärt!

Äs feins Zmittag himer im Restaurant Fritzenfluh gnosse. Ä schöne Ussichtspunkt, aber Fluhe hani keni gseh. Sisch halt Emmital mit vielne Höger, Felse ader äbe Flüeh hisi öppe weniger.

Kambly Truebschache muess ig allwäg nid vorstelle! Chami der allimal köschtlich amüsiere! Soviel gniesendi u schmatzendi Lüt imene Gschäft gsesch allwäg süsch niene. Güetzeni ässe bis zum geht nicht mehr, ohni zahle, wo chame das.Hami fürchterlich müesse zämeneh, dass ig der Schnäpfe mit Huet nid öppis frächs ha gsit. Die net i dene Schüsselene umegnuelet u allwäg gmint, zundersch sige die schönschte Güetzeni. Ke Landfrou! Me sötti die gniessende u mampfende Gsichter chöne filme. Ha niemer mit leerem Muul gseh. Tue no gärn d Lüt beobachte u mer allergattig Gedanke mache.

Ds Lucie mit Jahrgang 1928 het gfunde, dä luschtig Tag higi ihm guet da u üs allne isches öppe glich gange.

Bericht: Rosmarie Durand, Aeschi